IZarticle             |   IZ-article.ru  |   А Блог  |  Турецкий язык   |  Статьи о Турции  |
Бадзым муртъёслэн быремзы сярысь вашкалаослэн мадемзы.
Бадӟым муртъёслэн быремзы сярысь вашкалаослэн мадемзы.

Легенды,  мифы и сказки  Удмуртии на удмуртском языке.
Легенды Удмуртии на русском языке.



    Вашкала дыръя та дуннеын музон муртъёс улӥллям — туж бадӟымесь маръёс ке. Номыр малпатэк улӥллям, номыр ужаллямтэ. Ма, номыр ужаны но быгатӥллямтэ: пӧйшураны но, гырыны-кизьыны но, лэсьтӥськыны но. Ӝужыт нюлэскытӥ соос пушнер пӧлтӥ кадь гинэ ветлӥллям. Кытчы гинэ уг вамышты бадӟым адями — нюк-гоп кылдэ. Кутысьтыз сюйзэ куртке ке — вырйыл ӝутӥське.

    Со бадӟым адямиос бырон азьын пичи адямиос кылдӥллям. Одӥг пол со бадӟым адями, тэльын ветлыкуз, уморто подмаса пукись асьме кадь пичи адямиез адӟем. «Та сизьпи ук, лэся!» — шуыса, бадӟым адями со пичи адямиез кутэм но, калтаяз поныса, гуртаз нуэм. «Нэнэ-у,— шуэ, пе, гуртаз вуыса,— мон сизьпи шедьтӥ но, оломалы сизьпилэсь бадёымгес кадь потэ».

    — Э, пие, пие! Та сизьпи ӧвӧл, адями та! — шуэм мумиз.—

    Табере таӵе мурт быдэс дуннеетӥ вӧлдӥськоз, асьмеос одӥгтэм быром.

    Озьы шуыса, мумиз пиезлы пичи адямиез интыяз куштыны косэм. Соос, пе, пичиесь ке но, котьмар ужаны быгато: муш но вор до, пӧйшур кутылыны вы но йӧндыро. «Асьмелы кошкыны дыр вуиз. Кошком татысь!»—бӧрдыны кутскиз бадӟым адямилэн мумиз. Синкылиосыз усем интыын шуръёс бызьыны кутскизы. Трос кылдӥзы соос музъем вылэ.

    Кошкизы бадӟым адямиос уй пала.

    Но ваньмыз ик, пе, кошкиллямтэ. Кылемъёсыз из луиллям. Пуко вылэм соос одӥг пол тылскем дурын шунскыса. Сутскыны кутскем пыдъёссэс горд сюен нашталлям: тыллэсь палэнскыны нодлыксы тырмымтэ. Тыл кысэм бере, бадӟым адямиос кынмиллям но из луиллям.